la .slokrebaf. .e le ci cribe

::la .slokrebaf. .e le ci cribe::

::sei la .rabert.sautis. cu finti::

{img attId="888" heigth="392" width="514"}::

ni'o puzuvuku cu zasti fa ci cribe goi ko'a zi'e noi xabju lo zdani bu'u le cicricfoi .:i cmima fa lo banli je barda ke patfu cribe goi ko'e .e lo norbra ke mamta cribe goi ko'i .e lo cmatce ke cifnu cribe goi ko'o

ni'o ca lo cerni le ko'a mavystasu pu glare dukse fi lonu citka .:iseki'ubo ko'a jdice lonu litru le cicricfoi .:i ca lonu ko'a na zvati kei lo citno nixli goi ko'u zi'e noi se cmene zo .slokrebaf. pagre lei tricu gi'e zvafa'i le ko'a zdani .:i ko'u snada'i le vrogai gi'e ki'u lodu'u noda spuda cu catke kargau fo ri gi'e nerkla

ni'o ca'u ko'u zvati fa lo jubme ku jo'u ci stizu no'u pa barda stizu ku ce pa norbra stizu ku ce pa cmalu stizu .:i ga'ure'o le jubme cu zvati ci ctikabri be lo mavystasu be'o no'u pa barda ctikabri ku ce pa norbra ctikabri ku ce pa cmalu ctikabri ge'u jo'u ci smuci

ni'o la .slokrebaf. pu xagji .:ijebo le mavystasu cu simlu loka kukte .:iseki'ubo ko'u cu zutse le banli barda stizu gi'e lafti le barda smuci gi'e troci tu'a piso'o le mavystasu pe le barda ctikabri .:iku'i le stizu cu barda mutce gi'e jdari mutce .:ijebo le smuci cu tilju .:ijebo le mavystasu cu glare dukse

ni'o la .slokrebaf. pu plipe cliva co sutra gi'e jbikla le norbra stizu .:iku'i le ca stizu cu ranti ke dukse mutce .:ijebo ca lonu ko'u troci tu'a le mavystasu pe le norbra ctikabri kei my cu lenku dukse .:iseki'ubo ko'u jbikla le cmalu stizu gi'e lafti le cmarai smuci gi'e troci tu'a le mavystasu pe le cmatce ctikabri

ni'o caku my pu na glare dukse gi'e na lenku dukse .:i my cu sa'u mapti gi'e tai kukte ja'e lonu ko'u cu mulno citka

my .:iku'i ko'u cu tilju dukse fi le cmalu stizu .:ije ri cu porpi ri'a lo junta be ko'u

ni'o baku la .slokrebaf. pu gapkla fo lo serti gi'e zvafa'i ci ckana .:i zasti fa lo banli barda ckana .e lo norbra ckana .e lo cmatce cmalu ckana .:i ri'a ro le pu co'e ko'u cu manri tatpi .:iseki'ubo ko'u cpare nerkla le barda ckana gi'e vreta .:i le barda ckana cu jdari mutce gi'e barda ke dukse mutce .:ibabo ko'u troci tu'a le norbra ckana .:iku'i ri ranti ke dukse mutce .:iseki'ubo ko'u cpare nerkla le cmalu ckana .:i ri na jdari dukse gi'e na ranti dukse .:i sa'e ri gasmlu loka sa'u mapti gi'e se kufra gi'e glare .:ijebo bazi sai ku la .slokrebaf. co'a sipna mulno

ni'o baziku le ci cribe pu xrukla fi le cicricfoi .:i ko'a zi visysanji lonu da ba'o catke kargau fo le vrogai be fu le zdani be ko'a .:ijebo la patfu cribe cu vabycta gi'ebabo laucmo vecu'u lo fe'ucmo voksa

ni'o la mamta cribe pu cusku fo lo smaji je toljursa voksa fe "lu da ba'o zutse lo mi stizu li'u".:ibabo la cmlau cribe cu cusku fo lo cmalu je torbrato'a ke cifnu voksa fe "lu da ba'o zutse lo mi stizu gi'e ba'o popygau ri li'u"

ni'o baku la patfu cribe pu catlu lo ko'e ctikabri be lo mavystasu gi'e viska le smuci noi nenri cy gi'e cusku fo lo ko'e banli barda ke fe'ucmo voksa fe "lu da ba'o citka lo mi mavystasu li'u" .:ibabo la mamta cribe cu viska lonu lo ko'i ctikabri cu vasru lo smuci kei gi'e cusku fo lo ko'i smaji voksa fe "lu da ba'o citka lo mi mavystasu li'u" .:i la cmalu cribe cu catlu lo ko'o mavystasu ctikabri gi'e cusku fo lo ko'o cmalu je torbrato'a ke cifnu voksa fe "lu da ba'o citka lo mi mavystasu gi'e ba'o mo'u citka li'u"

ni'o baku le ci cribe pu gapkla fo lo serti .:ijebo la patfu cribe zi viska lonu lo ko'e ckana cu kalsa gi'e cusku fo lo ko'e banli barda ke fe'ucmo voksa fe "lu da ba'o sipna bu'u lo mi ckana li'u" .:i la mamta cribe cu viska lonu lo ko'i ckana cu si'a vasru lo kalri ckagai gi'e cusku fo lo ko'i smaji je toljursa voksa fe "lu da ba'o sipna bu'u lo mi ckana li'u" .:ibabo la cmalu cribe cu catlu lo ko'o ckana gi'e cusku fo lo ko'o cmalu je torbrato'a ke cifnu voksa fe "lu da ca'o sipna bu'u lo mi ckana li'u"

ni'o ko'o pu se torbrato'a co tai cladu ja'e lonu la .slokrebaf. co'a cikna co selspaji .:i ko'u plipe co cliva le ckana gi'e bajra cliva nitkla fo le serti fa'a le cicricfoi .:ije baku le ci cribe ze'e na'e viska ko'u