Statement by the Founder on the 20th anniversary of Lojban

Sent by lojbab on 11 October 2007 to the llg-members list as part of the 2007 LLG Annual Meeting.

ca'o le nunsalci be lenu li reno se nanca la lojban kei mi tercpe loinu peisnu lei fasnu .i mi pensi .i mi morji la'edi'e

.i pu'okiku mi na zukte tu'a la lojban .i noda terzu'e .aucu'i .ibabo la jycybyb bilma gi'e xanka le bavra'a be leri cnino bangu .i mi co'a zukte fi lenu le bangu cu renvi ba'o .a'o la jycybyb.

.i ca'oki la pasobizen. nanc. mi ctuca loi tadni la'ezoi gy. loglan. gy goi ly. iku'i la jycybyb na curmi le nu mi tervecnu lei vlacku be ly ja'e lenu le tadni naka'e tadni le valsi .isemu'ibo pa tadni po'u la kiym stidi lenu finti loi cnino valsi befi ly .i mi po'u la lojbab .e la noras .e la tomis .uitlok .i'i co'a finti loi lojbo gismu tezu'e loka tadni joi pilno loi valsi

.ibabo la jycybyb xusra loi nu fukpi jitro ponse loi valsi be ly .isemu'ibo .e'inai zukte fi loka zifre tadni joi pilno le bangu .e'icu'i

.ibabo le ci prulojbo ku joi la garis.br,djes. cu finti le cnino vlataijva .i co'a jmaji le mapti valsi be loi gismu be lei xa krabau .isemu'ibo zukte fi loka gi'uste xagmau ly

.ibabo loi prulojbo cu simpe'i lemi zdani fau lei so'umoi jbosalci .isemu'ibo zukte fi loka le jboce'u cu se'itru .e'e

.ibabo la noras .e mi simspebi'o .iu .ije ritli bau loi prulojbau .ibabo pamoi ke clani simta'a bau la lojban ca'o lemi'a spebi'oli'u .isemu'ibo so'imei jbonunpli

.i ca la'o gy Evecon 88 gy kiku mi'a gubja'o la'o gy Loglan-88 gy no'u la lojban .i so'i prenu cu selci'i .isemu'ibo lo jboce'u cu ranji banro .i renomei nanca

.i da'okiku .i mi seja'eku morji .o'a .i caku ba'e mi na termu'i fi tu'a la lojban mu'i lenu le ba'emi terzu'e ba'o vajni .einai .i ku'i doi lojbo ro do .e'u .eidai zukte fi da .a de .a di .i ba'o tu'a mi kiku vrici terzu'e .i ko cuxna je zukte .ije vrici nunsnada .i ba'obo selmo'i ba'e do .i ko lifri

mi'e lojbab