la katcikatcik.cmanan

From Lojban
Jump to navigation Jump to search

la katcikatcik.cmanan

かちかち山


SOURCE: a Japanese folktail, "Kachi-Kachi Yama"

KEYWORDS: old man & woman, tanuki (Japanese racoon dog), rabbit, soup, firewood, red pepper, miso, sugi (Japanese cedar), boat

ANOMALIES: no dot (except between cmenes); punctuational comma; no lujvo; {} instead of LU; - instead of i; no ni'o



    puzubu'uku ge ko'a goi la ojiisan laldo nanmu gi ko'e goi la obaasan laldo ninmu

    ko'a fi lo cange cu sombo co sanga { au lo pa tsiju cu binxo lo ki'o tsiju } - ku'i lo dalrtanuki goi T poi ca'o zgana la'edi'u ku'o, ba lo nu ko'a xruti cliva, cu klama le cange secu'u { ca'e lo pa mei ze'e pa mei }, gi'e citka ro le tsiju u'anai

    ju'e baze'uku zo'e na'e te tsiju - je ko'a la'edi'u ze'u pensi uanaidai - caku facki lo du'u T fuzme - ki'uku ko'a, sezu'e lo simlu be lo ka ce'u xruti cliva, cu denpa lo mu'e T klama - T ca'a klama - ko'a sepi'o lo skori poi ke'a vo'a vo'a pu se sabji cu kavbu T

    ko'a bevri T lo zdani gi'e cusku fi ko'e fe { uo.u'a kavbu lo palci dalrtanuki - ai ba jukpa gi'e citka lo stasntanuki } - za'ure'u cliva klama le cange

    bu'u le zdani ko'e co'a bredi lo nu jukpa lo stasntanuki - T seci'o fapro fi lo nu se citka gi'e rivbi saidai troci - ku'i gau T no zo'e co'i tadji lo nu snada cliva lo skori - mu'iku T cusku fi ko'e fe { doi obaasan le skori cu tagji co cortu rinka - e'o gau ko kluza } - { da'i go'i ja'e lo nu do ba rivbi cliva - da'i do cliva ja'e lo nu la ojiisan ba fengu } se cusku ko'e fau lo za'i gunka ranji - T co'i platu zo'e - cusku { doi obaasan i'a.u'u mi pu xlali dalrtanuki - ia krinu lo nu mi se citka - ku'i pe'i lo nu jukpa lo stasntanuki cu nandu lo pamei - ai.e'u mi sidju - mi ca lo nu la ojiisan xruti klama cu ba'o xruti seltagji, vau oinaipei } sekai lo ka cumla - la'edi'u co'i tcica sai ko'e, lo nu secu'u { je'eru'e - ki'uku i'a.ai sidju mi } gasnu lo nu lo skori cu kluza - bazibo T darxi ko'e - ja'ebo ko'e morsi binxo - T, ii, vimcu lo skapi ko'e, gi'e renro lo rectu lo jukpa tansi, ja'e lo nu jicla - T gasnu lo nu le skapi cu gacri vo'a kei, gi'ebabo denpa lo nu ko'a klama

    co'i lo mu'e ko'a xruti kei, { doi ojiisan ba'anai o'inai mi fi tu'a le dalrtanuki pu jukpa fe lo stasu } se cusku T, noi se gacri le ko'e skapi - ko'a { ue - a'idai do ba'o gunka }

    ko'a, fai lo si'o ko'e iodai troci kakne, cu cpacu lo co'i tisna stasu T, pe ke'u fi'o gacri le ko'e skapi - secu'u { za'aru'e lo rectu cu jdari - ri'abo na'e citno dalrtanuki vau uanai }, ko'a citka ku'i le stasu - co'i lo mu'e go'i so'e ri kei, T skapi to'e dasni gi'e jarco lo vo'a jetnu tarmi - T festi cusku { uocai do citka citka - ta rectu la baasan noi mi catra ce'o jicla ke'a vau ju'a - uunaile'o } gi'e zi cliva, ca lo za'i ko'a jenca stali

    ko'a, ri'a lo dukse menli kalsa, cu binxo lo to'e sanli - je'u ge po'onai pu se tcica T, gi ji'a cirko ko'e, no'u lo pamrai, zi'e noi ba'anaisaidai citka ke'a - ca lo nu ko'a nejni claxu klaku kei, lo ractu goi R cu klama - { doi ojiisan - doi ojiisan - ba'o mo } - ko'a fi R ciksi fe ro da - babo R, secu'u { ionaicai - aicai venfu }, plipe cliva

    R, bu'u lo cmana poi ta'e se vitke T, cu lafti cpacu lo tricu jimca - T ra'i klama - { doi racton, ca'o mo } - { simlu lo ka baku le cabna nanca dunra cu lenku - semu'ibo mi lo se fagri jimca cu jaigau jmaji seva'u - e'u do ji'a ka'e ba se prali fi lo nu ba'o go'i } - semu'ibo T fi'o se kansa R go'e - baku lo jimca cu culno jmaji - seki'ubo le remei co'a to'e cpare le cmana - R curmi lo nu T lidne vo'a - je, vi lo se bevri pe lo T trixe ku, R darxi gasnu tu'a lo fagri rinka rokci spisa tutci - sa'ei katcik - sa'ei katcik - { doi racton, uanai lo sa'ei katcikatcik sance cu mo } - R secu'u { ta zo'u la katcikatcik.cipnin pe la katcikatcik.cmanan cu sanga } tcica - babo co'i fagri loi jimca, ja'e lo zu'o co'a sance - sa'ei patcip - sa'ei patcip - { doi racton, uanai lo sa'ei patcipatcip sance cu mo } - R secu'u { ta zo'u la patcipatcip.cipnin pe la patcipatcip.cmanan cu sanga } za'ure'u tcica - babo lo fagri po'e loi jimca co'a carmi - sa'ei box - sa'ei box - { doi racton, uanai lo sa'ei boxbox sance cu mo } - R secu'u { ta zo'u la boxbox.cipnin pe la boxbox.cmanan cu sanga } za'ure'u tcica - ku'i babo T co'a ganse lo ka glare vi le vo'a trixe - krixa { oiro'o oiro'o }, gi'e bajra cliva

    ca lo balvi djedi, R zbasu lo tsapntoogaraci pexrmiso gi'e klama lo T zdani - T secu'u { doido'u ionaile'o do jaigau betri mi vau ba'anai } fengu - ku'i R fi'o flira lo xalbo cu te preti fi { tavla fi ma uanai } - T gunta simlu cusku { ca le purci djedi bu'u la katcikatcik.cmanan do jaigau xrani mi vau oiro'oba'anai } - ku'i R spuda secu'u { lo ractu pe la katcikatcik.cmanan du lo ractu pe la katcikatcik.cmanan - na'e srana lo ractu pe la toogaracin.cmanan } - ju'e T fai { oiro'enai } se mansa - R cusku { jelca xrani xu - uu - uase'i mi casai ponse lo go'i ve mikce - i'apei gacri gasnu } - T co'i se tcica sai secu'u { y - se'anai - i'a } - ju'e R gasnu lo nu le tsapntoogaraci pexrmiso cu gacri - le pesxu cu cpina jinru tu'a le jelca xrani, seri'a lo T cortu je krixa - ca'obo R sutra cliva

    ca lo balvi djedi, R bu'u lo ckunrsugi cmana be vi le T zdani cu katna lo tricu - T ra'i klama - secu'u { u'ale'o do vi zvati - gau do le mabla ve mikce cu gacri mi vau oiro'ocai ba'anai } fengu - R te preti fi { tavla fi ma } - seki'ubo T ciksi tu'a le purci djedi - babo R cusku { lo ractu pe la toogaracin.cmanan du lo ractu pe la toogaracin.cmanan - na'e srana lo ractu pe la sugin.cmanan } - ju'e T fai { oiro'enai } se mansa - R cusku { ta'o mi ca katna lo tricu tezu'e lo nu zbasu lo bloti - ai kalte lo finpe mu'a - aipei } - T spuda fi { pluka simlu } - R cusku { mi ki'u lo nu xadni blabi cu zbasu lo tricu bloti - do ki'u lo nu xadni xekri cu go'i lo dertu bloti, vau pe'ipei } - T tugni, gi'e co'a danre zbasu fi lo dertu - baku R e T zo'ibu'u lo rirxe cu finpe kalte simxu - ge le R bloti ri'a lo tricu te zbasu cu fulta snada, gi ku'i le T bloti ri'a lo dertu te zbasu cu cfari co runta, ce'o se kevna, ce'o jinru - { ii aucai sidju } se krixa T - ku'i R secu'u { do catra la obaasan gi'e gasnu lo nu ri se citka la ojiisan - ju'o co'i dapma janli do } na'e gasnu - ja'ebo T mo'u jinru lo rirxe, gi'e morsi binxo

    fa'o